Gjatë protestës së zhvilluar sot para Kryeministrisë, në kuadër të lëvizjes për mbrojtjen e Zvërnecit, janë shënuar momente tensioni. Teksa disa qytetarë po mbanin fjalime në podium, ata kanë thirrur “Berisha n’burg”, veprim i cili u kundërshtua me zhurma nga pjesëtarët e Forumit Rinor të Partisë Demokratike (FRPD).
Njëra prej folëseve në podium, përmes një megafoni, u bëri thirrje të rinjve të FRPD-së të mos ndërhyjnë, duke theksuar natyrën qytetare të tubimit: “Çuna, nuk ka parti këtu. Është jashtë partive, është për Shqipërinë”.
Grupi i të rinjve të FRPD-së kishte nisur marshimin nga sheshi “Skënderbej” drejt bulevardit “Dëshmorët e Kombit”, duke u shkëputur nga pjesa tjetër e pjesëmarrësve. Tensionet mes qytetarëve dhe përfaqësuesve të FRPD-së janë shfaqur që dy ditë më parë, kur protestuesit kërkuan largimin e elementeve partiakë nga tubimi. Në këtë kontekst, edhe deputeti i Lëvizjes Bashkë, Redi Muçi, është akuzuar nga palë të ndryshme për cenim të rrjedhës së protestës.
Kreu i Partisë Demokratike, Sali Berisha, kishte bërë thirrje paraditen e sotme që mbështetësit të merrnin pjesë në protestë, por pa përdorur simbolet e partisë.