Partia Demokratike ka nisur sot protestën e radhës në bulevardin Dëshmorët e Kombit në Tiranë. Kreu i saj, Sali Berisha, ka dalë nga selia e partisë dhe është nisur me militantët drejt Kryeministrisë, duke e hapur zyrtarisht tubimin.
Kjo është protesta e 8-të nën moton "kilometri i fundit", me rikthim te marshimet. Pjesëmarrja është e lartë pavarësisht reshjeve intensive të shiut. Tubimi është parashikuar të zhvillohet në orën 19:00 para Kryeministrisë.
Drejtoria e Policisë së Shtetit ka mobilizuar 1500 efektivë për garantimin e rendit. Kryepolici Skënder Hita ka dalë në terren dhe ka porositur forcat për qetësi dhe profesionalizëm. Ai ka njoftuar se leja i është dhënë PD-së vetëm për zhvillimin e protestës në bulevard, ndërsa në rast shkeljesh ligjore do të merren masa.
Demokratët kanë konsideruar deklaratën e kryepolicit si provokim.
Përditësime
Protesta e PD-së u mbyll pas rreth 90 minutash përplasjesh.
- Protestuesit hodhën kokteje molotov dhe fishekzjarre; policia u përgjigj me gaz lotsjellës dhe ujë me presion.
- Protesta u zhvendos drejt Ministrisë së Brendshme me tensione të larta.
- Deputetët Gazment Bardhi dhe Flamur Noka u përplasën me policinë.
- Sali Berisha e quajti protestën paqësore, por u pengua nga policia.
- Tubimi nisi në orën 20:00, jo 19:00 siç ishte planifikuar.