Sali Berisha, kreu i Partisë Demokratike, mbërriti rreth orës 18:00 të së shtunës, 28 shkurt 2026, në selinë e PD-së në Tiranë. Ai u prit nga qindra mbështetës dhe simpatizantë demokratë, të cilët u nisën në marshim drejt bulevardit Dëshmorët e Kombit dhe godinës së Kryeministrisë.
Berisha marshoi i shoqëruar nga drejtues të lartë të PD-së dhe qytetarë. Protestuesit mbajnë flamuj kuqezi, amerikanë dhe të Bashkimit Evropian, si dhe pankarta me fotografi të Edi Ramës, Belinda Ballukut, Engjëll Agaçit dhe Xhorxh Sorosit. Ata brohorasin slogane si "Rama ik!", "Rama në burg!" dhe "Poshtë komunizmi!". Berisha dhe drejtuesit e PD-së kanë hequr kollaren dhe duken të përgatitur për një marshim të gjatë.
Protesta zhvillohet në vazhdimësi të asaj të së premtes së kaluar. Mbledhja fillestare parashikohet para Kryeministrisë, pas së cilës protestuesit mund të ndahen në dy grupe për të vazhduar drejt Parlamentit ose institucioneve të tjera. Gjithashtu pritet një marshim në perimetrin e unazës së mesme të Tiranës. Pjesëmarrja raportohet e lartë.
Policia e Tiranës ka njoftuar se nuk garanton zhvillimin e tubimit, ashtu si në protestën e mëparshme. Megjithatë, ajo ka marrë masa për garantimin e rendit dhe sigurisë publike, mbrojtjen e institucioneve shtetërore, si dhe lëvizjen e lirë të automjeteve dhe qytetarëve. Në zonë vërehet prani e shtuar policore, përfshirë snajperistë në tarracën e Kryeministrisë dhe forca të shumta.
Përditësime
Protesta e pestë kombëtare e opozitës fillon pa podium apo fjalime, ndryshe nga tubimet e mëparshme.
Policia e Shtetit ka angazhuar mbi 1500 efektivë dhe ka vendosur barriera metalike para Kryeministrisë.
• Forca policore janë shpërndarë në Ministrinë e Infrastrukturës dhe Selinë e PS-së.
• Organizuesit thonë se protesta do të jetë plotësisht në dorë të qytetarëve.