Një tentim vrasjeje ka ndodhur sot në Istog. Ngjarja u raportua rreth orës 14:40 në rrugën “Lidhja e Prizrenit”, afër stacionit të autobusëve.
Zëdhënësi i Prokurorisë Themelore të Pejës, Shkodran Nikçi, konfirmoi se rasti është klasifikuar si “Vrasje në tentativë”. Ai deklaroi se dy persona u lënduan gjatë një përleshjeje, njëri prej tyre në gjendje kritike.
I lënduari, i lindur në vitin 2005, u transferua nga Spitali i Pejës në QKUK, ku po trajtohet nga ekipet e kirurgjisë torakale, abdominale dhe anestezionit. Drejtori i Emergjencës në QKUK, Naser Syla, tha se pacienti është në gjendje të rëndë dhe do të kalojë në Mjekimin Intensiv pas ndërhyrjes.
Personi tjetër mori trajtim mjekësor në Spitalin Rajonal të Pejës dhe nuk është në rrezik për jetën. Zëdhënësi i Policisë së Kosovës për Rajonin e Pejës, Fadil Gashi, bëri të ditur se policia gjeti disa dëshmi në vendngjarje.
Për shkak të përfshirjes së personave të mitur, autoritetet janë të rezervuara në dhënien e më shumë detajeve. Hetimet vazhdojnë nga policia dhe prokuroria.