Një tërmet me magnitudë 5.3 ballë të shkallës Richter goditi në orët e para të mëngjesit të së dielës veriperëndimin e Greqisë, pranë kufirit me Shqipërinë. Lëkundja kryesore u regjistrua në orën 05:32 me orën lokale greke.
Sipas Institutit Gjeodinamik të Greqisë, epiqendra ndodhi rreth 12 km në lindje të Leptokarisë në rajonin e Thesprotit, me thellësi fokale 12.9 km. Katër minuta më vonë u regjistrua një pasgoditje me magnitudë 4.7 ballë në të njëjtën zonë, rreth 20 km nga qyteti i Janinës.
Lëkundjet u ndjenë në Ishujt Jonianë, përfshirë Korfuzin dhe Lefkadën, si dhe në pjesë të Thesalisë dhe jug të Shqipërisë. Në Janinë, banorët dolën në rrugë.
Profesori i sizmologjisë Efthimios Lekkas deklaroi për median publike greke ERT se tërmeti ndodhi në një thellësi të vogël dhe zona ka histori aktiviteti sizmik. Ai vuri në dukje se tërmetet e kësaj magnitudë zakonisht nuk japin paralajmërim paraprak.
Nënkryetari i bashkisë së Janinës për Mbrojtjen Civile, Efthimios Chrysostomou, konfirmoi mungesën e dëmeve materiale apo personave të lënduar. Guvernatori i Epirit, Alexandros Kahrimanis, raportoi rrëshqitje shkëmbinjsh në Autostradën Egnatia drejt Igumenicës. Ndërprerje të energjisë elektrike ndodhën në Janinë, ku u rivendosën shpejt në qytet, por zgjati më gjatë në zonat periferike.
Deri tani nuk ka raporte për viktima apo dëme të mëdha.
Përditësime
Regjistrohet një pasgoditje shtesë me magnitudë 3.4.
Lëkundjet ndihen kryesisht në Sarandë dhe Gjirokastër.
Një qytetar në Sarandë tha: "Na zgjoi nga gjumi, pasi tundej krevati".
Lekkas e quajti pasgoditjen "shenjë pozitive" dhe këshilloi të mos përdoren banesat pa u kontrolluar.
Guvernatori raportoi se tërmeti ishte "shumë i fortë" në bashkinë Zitsa, ndërsa pasgoditjet vijojnë.
Efthimios Chrysostomou deklaroi: "Njerëzit kanë dalë, janë të frikësuar dhe, siç ndodh në tërmetet mbi 5 të shkallës Richter, ka pasur ndërprerje të energjisë elektrike". Lëkundjet u ndjenë deri në Patra.