Ishulli Evia në Greqi u trondit mesditën e kësaj të diele nga dy lëkundje të forta sizmike, të cilat u ndjenë deri në Athinë. Sipas Institutit Gjeodinamik të Greqisë, tërmeti i parë u regjistrua në orën 12:58, me magnitudë 4.8 dhe thellësi rreth 5 kilometra. Pak minuta më vonë, zona u godit nga një lëkundje e dytë me magnitudë 5.2, me epiqendër pranë Prokopit, në pjesën veriore të ishullit.
Si pasojë e aktivitetit sizmik, janë raportuar dëme materiale në banesa në zonat e Prokopit dhe Dafnusës, si dhe rrëshqitje dherash e gurësh në disa segmente rrugore. Gjithashtu, është dëmtuar kisha e Shën Gjergjit pranë Prokopit, ku në momentin e tërmetit po zhvillohej një ceremoni pagëzimi. Deri më tani nuk ka raportime për persona të lënduar.
Kryebashkiaku i Mantudit, Janis Capurniotis, konfirmoi se ekipet e emergjencës ndodhen në terren për të vlerësuar situatën. Ekspertët sizmologë kanë bërë thirrje për qetësi. Profesori Kostas Papazachos deklaroi se zona njihet për aktivitet sizmik dhe nuk ka vend për alarm të pajustifikuar. Nga ana tjetër, sizmologu Athanasios Ganas vuri në dukje se rajoni është i prirur për tërmete me magnitudë deri në 5.5 shkallë Rihter, ndërsa theksoi se është ende herët për të përcaktuar nëse tërmeti i dytë përbënte lëkundjen kryesore.