Japonia u godit nga një tërmet me magnitudë 5.9 në orët e para të mëngjesit të datës 23 gusht 2026. Epiqendra e lëkundjeve sizmike u regjistrua në pjesën jugore të prefekturës Ibaraki, në një thellësi prej 68 kilometrash, ndërsa efektet u ndjenë dukshëm edhe në kryeqytetin Tokio.
Sipas të dhënave nga Agjencia japoneze për Menaxhimin e Zjarreve dhe Fatkeqësive, si pasojë e lëkundjeve janë raportuar 37 persona të plagosur, ku njëri prej tyre ndodhet në gjendje të rëndë shëndetësore. Të lënduar janë regjistruar në prefekturat Tokio, Saitama, Kanagaëa, Chiba dhe Ibaraki. Përveç dëmeve njerëzore, janë raportuar dëme materiale në të paktën një ndërtesë në Saitama dhe ndërprerje të përkohshme në linjat hekurudhore në Tokio.
Autoritetet japoneze kanë deklaruar se nuk ekziston rrezik për cunami. Sistemi i paralajmërimit të hershëm mundësoi lajmërimin e popullatës disa sekonda përpara goditjeve kryesore, duke lejuar marrjen e masave mbrojtëse dhe frenimin automatik të trenave. Kryeministrja japoneze Sanae Takaichi u bëri thirrje qytetarëve për vigjilencë, duke qenë se mundësia e lëkundjeve pasuese mbetet e pranishme.
Ambasada e Republikës së Shqipërisë në Tokio, nën drejtimin e ambasadorit Ermal Muça, ka lëshuar një apel për qytetarët shqiptarë që jetojnë ose vizitojnë vendin. Ata këshillohen të zbatojnë me përpikmëri udhëzimet e autoriteteve japoneze për shkak të situatës së krijuar nga tërmeti, por edhe nga reshjet e dendura të ditëve të fundit. Për çdo nevojë, shtetasit shqiptarë mund të kontaktojnë ambasadën përmes numrit të WhatsApp +81–70-9023-3905 ose adresës elektronike embassy.tokyo@mfa.gov.al.