Myftiu i Bashkësisë Islame të Kosovës, Naim Tërnava, në prag të përfundimit të Ramazanit, foli për rëndësinë e këtij muaji të shenjtë. Ai u ndal te Nata e Kadrit, nata më e veçantë e Ramazanit, dhe bëri thirrje që besimtarët islamë ta kërkojnë duke kryer vepra të mira për shpërblime të shumëfishta.
Tërnava theksoi bashkëjetesën e mirë fetare dhe bashkëpunimin e bashkësive fetare me institucionet qendrore. "Tash e 27 vjet pas luftës, në Kosovë politika kosovare asnjëherë nuk është përzier në punët fetare brenda bashkësive fetare, e as brenda BIK. Me një fjalë, kemi pasur lirinë, pavarësisht se qeveria nga cila parti ka qenë, ne kemi bashkëpunuar jashtëzakonisht me ta. E kemi ndihmuar shtetin shumë, ai nuk ndihmohet veç me para e tatime. Shteti ndihmohet edhe përmes faljes së sigurisë, harmonisë, përmes xhamive ku kemi ftuar ligjërues për solidaritet e sakrificë mes vete", tha ai.
Myftiu foli edhe për rëndësinë e lirisë në praktikën fetare. Ai krahasoi situatën aktuale me kohën e okupimit serb, kur xhamitë ishin të mbyllura gjatë namazeve të xhuma apo Bajramit, pasi forcat okupuese nuk lejonin besimtarët të shkonin në faltore. Sot ka mundësi më të mëdha për punë fetare, edukim të masës dhe njohuri më të drejta për fenë.