Ndeshja mes Vardarit dhe Bashkimit në Maqedoninë e Veriut u mbyll me fitoren minimale 1-0 të vendasve, të shënuar në pjesën e parë. Rezultati sportiv kaloi në plan të dytë për shkak të incidenteve në tribuna.
Në minutat e fundit, gjyqtari ndërpreu përkohësisht lojën për të qetësuar situatën. Shkak u bënë thirrjet ofenduese dhe raciste në kor nga një pjesë e tifozëve të Vardarit ndaj klubit shqiptar Bashkimi.
Tensionet vazhduan pas vërshëllimës finale. Pamjet e publikuara tregojnë përplasje mes forcave të policisë dhe pjesëtarëve të stafit të Bashkimit, jashtë fushës së lojës.
Në kampionatin maqedonas, Vardari vazhdon të kryesojë me nëntë pikë avantazh ndaj ndjekësve më të afërt, Struga dhe Shkëndija. Kuqezinjtë do të luajnë ndeshjen e radhës kundër Sileksit.