Shkrime anti-shqiptare dhe mesazhe me gjuhë urrejtjeje u shfaqën në qendrën sportive Forca në Shkup të Maqedonisë së Veriut. Fotografia e mbishkrimit “As në tokë, as në qiell, vend për shqiptarë nuk ka” qarkulloi gjerësisht në rrjetet sociale.
Ngjarja ndodhi disa ditë pas protestës së studentëve shqiptarë që kërkonin zhvillimin e provimit të jurisprudencës në gjuhën shqipe. Studentët u nisën nga Ura e Gurit drejt Ministrisë së Drejtësisë dhe kërkuan zbatimin e Ligjit të gjuhëve. Gjatë protestës policia ndërhyri dhe arrestoi tre persona.
Pamja u shpërnda edhe nga disa figura politike dhe aktivistë që kërkuan reagim nga autoritetet. Deri tani asnjë institucion zyrtar i Maqedonisë së Veriut nuk ka dhënë përgjigje. Në të njëjtën periudhë janë raportuar edhe thirrje anti-shqiptare nga tifozeritë maqedonase gjatë aktiviteteve sportive.