Ministria për Europën dhe Punët e Jashtme e Shqipërisë mirëpret sot, në orën 10:00, në Pallatin e Brigadave në Tiranë, Ministerialin e Korridorit VIII. Ky sesion ministror, i drejtuar nga ministrja Elisa Spiropali, mblidhet për të riafirmuar rëndësinë strategjike të këtij korridori infrastrukturor në fushën e ndërlidhjes, qëndrueshmërisë dhe integrimit rajonal.
Në takim marrin pjesë delegacione nga Shqipëria, Italia (kryesuar nga Antonio Tajani, zëvendëskryeministër dhe ministër i Punëve të Jashtme), Maqedonia e Veriut (Timčho Mucunski, ministër i Punëve të Jashtme dhe Tregtisë së Jashtme), Rumania (Oana-Silvia Țoiu, ministre e Punëve të Jashtme) dhe Bullgaria (Nikolay Pavlov, zëvendësministër i Punëve të Jashtme).
Programi i sesioneve
Diskutimet përqendrohen në rolin e Korridorit VIII si bosht strategjik për zhvillimin ekonomik, sigurinë, stabilitetin rajonal dhe ndërveprueshmërinë midis Bashkimit Europian dhe NATO-s. Sesioni plenar trajton temën “Korridori VIII në udhëkryqin strategjik të Evropës: Lidhshmëria, Rezistenca dhe Prosperiteti i Përbashkët”.
Ministeriali organizohet në katër panele:
- Dy panelet e para: Vizioni politik për prioritetet evropiane të zhvillimit ekonomik dhe Korridori VIII si katalizator i ndërlidhjes së qëndrueshme dhe rritjes së gjelbër.
- Paneli i tretë: Dimensioni gjeopolitik.
- Paneli i fundit: Financimi i korridorit.
Pritet nënshkrimi i një deklarate të përbashkët, si dhe takime dypalëshe dhe një konferencë e përbashkët për shtyp.
Forumi Ekonomik
Paralelisht, në Bankën e Shqipërisë (Ndërtesa nr. 2, ish-Hotel Dajti), zhvillohet Forumi Ekonomik për Korridorin VIII me temën “Nga Lidhja Strategjike te Rritja Rajonale: Potenciali Ekonomik i Korridorit VIII”. Ky forum bashkon zyrtarë publikë, institucione evropiane, financiare ndërkombëtare dhe aktorë ekonomikë për të diskutuar lehtësimin e tregtisë, zhvillimin industrial dhe mobilizimin e fondeve evropiane e ndërkombëtare.
Përditësime
Elva Spiropali mikpriti krerët e delegacioneve pjesëmarrëse në Ministerialin e Korridorit VIII në Tiranë.
Programi zhvillohet sipas këtij rendi:
- Fjalët hapëse nga Spiropali;
- Fjalimet e përfaqësuesve;
- Foto familjare në orën 11:00;
- Pushim kafeje;
- Takime bilaterale;
- Konferencë shtypi në orën 11:00.
Pjesëmarrës për Rumaninë është ambasadori Octavian Şerban, jo ministrja Oana-Silvia Țoiu.
Ministrat e Korridorit VIII publikuan deklaratën e përbashkët pas ministerialit në Tiranë.
Deklarata thekson:
- Rëndësinë strategjike të lëvizshmërisë ushtarake dhe të qëndrueshmërisë.
- Bashkëpunimin BE-NATO.
- Mbrojtjen e infrastrukturave kritike kundër kërcënimeve hibride.
Ata u angazhuan për mobilizimin e fondeve nga BE përmes CEF, IPA III dhe WBIF.