Tirana organizon Ministerialin e Korridorit VIII më 18 shkurt 2026

Tirana do të mirëpresë më 18 shkurt 2026 Ministerialin e Korridorit VIII, një projekt të rëndësishëm infrastrukturor dhe gjeopolitik rajonal. Takimi zhvillohet në Pallatin e Brigadave, me pjesëmarrjen e delegacioneve nga Shqipëria, Maqedonia e Veriut, Bullgaria, Italia dhe Rumania, si dhe përfaqësues nga vende partnere.

Ky ministerial synon të thellojë bashkëpunimin ndërqeveritar për përshpejtimin e zhvillimit të Korridorit VIII si arterie strategjike transporti, zhvillimi ekonomik dhe sigurie. Ai kontribuon në forcimin e integrimit rajonal dhe në ndërlidhjen me rrjetet kryesore evropiane.

Tema e seancës plenare

Seanca plenare trajton temën: “Korridori VIII në momentin strategjik të Evropës: Lidhshmëria, qëndrueshmëria përmes lëvizshmërisë ushtarake dhe prosperiteti i përbashkët përmes integrimit”. Kjo thekson rolin e korridorit si shtyllë strategjike që bashkon dimensionet ekonomike, të sigurisë dhe të ndërlidhjes rajonale për prosperitet të përbashkët.

Gjatë takimit pritet miratimi i një deklarate të përbashkët, si dhe zhvillimi i takimeve dypalëshe dhe një konference të përbashkët për shtyp.

Forumi Ekonomik

Në kuadër të ministerialit mbahet Forumi Ekonomik për Korridorin VIII në ambjentet e Bankës së Shqipërisë (Godina nr. 2, ish Hotel Dajti). Tema e tij është: “Nga Lidhja Strategjike drejt Rritjes Ekonomike Rajonale: Potenciali Ekonomik i Korridorit VIII”.

Forumi bashkon autoritetet publike, institucionet evropiane, institucionet financiare ndërkombëtare dhe aktorët ekonomikë. Diskutimet fokusohen në:

• Lehtësimin e tregtisë;
• Zhvillimin industrial;
• Rritjen e konkurrueshmërisë rajonale.

Ai synon të mobilizojë instrumente evropiane dhe ndërkombëtare financimi, si dhe të prodhojë rekomandime konkrete për ta shndërruar Korridorin VIII në katalizator të investimeve, rritjes dhe integrimit ekonomik rajonal.