Sot, në Tiranë, mbahet protesta e 28-të kombëtare kundër qeverisë, ku pjesëmarrjes së qytetarëve nga i gjithë vendi pritet t’i bashkohen edhe përfaqësues nga diaspora. Grumbullimi është parashikuar të nisë në orën 19:00 në sheshin “Skënderbej”, për të vijuar më pas me një marshim drejt godinës së Kryeministrisë.
Kërkesat e parashtruara nga organizatorët të këtij tubimi përfshijnë:
• Dorëheqjen e panegociueshme të kryeministrit Edi Rama dhe të qeverisë.
• Krijimin e një qeverie teknike tranzitore, jopartiake, me mandat 12-mujor.
• Ndryshime kushtetuese përmes referendumit popullor, duke përfshirë ndryshimin e Kodit Zgjedhor dhe kufizimin e mandatit të kryeministrit në jo më shumë se dy mandate gjatë gjithë jetës politike.
• Anulimin e ndryshimeve në ligjin për zonat e mbrojtura, për trashëgiminë kulturore, shfuqizimin e Paketës së Maleve dhe të kuadrit ligjor për investimet strategjike.
• Hartimin e një kontrate të re sociale pas konsultimeve me ekspertë dhe qytetarë.
Organizatorët kanë deklaruar se protestat do të vazhdojnë deri në përmbushjen e kërkesave të tyre, ndërsa tubimi pritet të shoqërohet me fjalime dhe marshim në rrugët e kryeqytetit.
Përditësime
Një delegacion i Parlamentit Evropian mbërriti sot në Tiranë për të ndjekur protestën e 28-të kombëtare kundër qeverisë. Eurodeputetët kanë konfirmuar pjesëmarrjen në tubim, duke theksuar interesin e tyre për zhvillimet politike në vend.