Platformat online që ofrojnë shërbime eskorte janë shndërruar në kanale për trafikimin e qenieve njerëzore në Kosovë. Nëpërmjet këtyre faqeve, përdoruesit mund të përzgjedhin profile të ndryshme, përfshirë gra nga shtetet e Amerikës Latine, të cilat dyshohet se janë viktima të trafikimit.
Zana Sadiku-Sertolli, koordinatore për veprat penale të trafikimit me qenie njerëzore në Prokurorinë Themelore në Prishtinë, shpjegon se metoda e rekrutimit ka evoluar. Gratë vijnë në Kosovë me lejeqëndrime dhe kontrata pune të rregullta, gjë që e bën identifikimin e tyre dhe ndjekjen penale të trafikantëve më të vështirë për autoritetet.
Institucionet përgjegjëse ende nuk kanë reaguar për këtë problematikë:
- Ministria e Punëve të Brendshme, përgjegjëse për lëshimin e lejeve të punës për shtetas të huaj, nuk ka kthyer përgjigje për pyetjet lidhur me strategjitë e parandalimit të këtij fenomeni prej tre javësh.
- Autoriteti Rregullativ i Komunikimeve Elektronike dhe Postare (ARKEP) nuk ka komentuar nëse do të ndërmerren masa për bllokimin e këtyre platformave. Ky institucion, në të kaluarën, ka ndërhyrë duke urdhëruar ofruesit e internetit për kufizimin e qasjes në faqe të tjera, siç ishte rasti i mediave ruse të sanksionuara.
Përditësime
Policia e Kosovës ka konfirmuar zyrtarisht se është duke monitoruar ueb-faqe të dyshuara ku listohen shtetase nga Amerika Latine, në kuadër të hetimeve për trafikim të qenieve njerëzore. Institucioni po shqyrton lidhjet e këtyre platformave me rastet e mundshme të trafikimit, duke vërtetuar raportimet e mëparshme të Radio Evropës së Lirë.