Një tragjedi e rëndë ka ndodhur në Milano Marittima, në bregdetin e Ravenës, ku një vajzë 4-vjeçare nga Austria, e identifikuar si Magdalena, ka humbur jetën pasi u mbyt në pishinën e një hoteli.
Sipas hetimeve të kryera nga Karabinierët, babai i së miturës i kishte kërkuar asaj të priste në një zonë midis këndit të lojërave dhe pishinës, ndërsa ai u largua për pak minuta, me gjasë për të marrë diçka në dhomë. Pamjet e kamerave të sigurisë tregojnë vogëlushen duke ecur e vetme drejt pishinës, ku dyshohet se ka qëndruar në ujë për 7-8 minuta përpara se dy fëmijë të tjerë të jepnin alarmin.
Një mjek që ndodhej rastësisht në ambientet e hotelit tentoi t'i jepte ndihmën e parë, por përpjekjet kanë qenë të pasuksesshme. Hetuesit konstatuan se në momentin e ngjarjes, rreth orës 14:00, pishina nuk kishte shërbim roje shpëtimi dhe hyrja ishte e hapur. Pishina e hotelit është sekuestruar nga autoritetet.
Aktualisht, Prokuroria e Ravenës ka hapur një procedim penal. Babai ndodhet nën hetim me dyshimin për braktisje fëmije, ndërsa po shqyrtohet edhe mundësia e ngritjes së akuzës për vrasje nga pakujdesia. Një autopsi pritet të kryhet në ditët në vijim për të përcaktuar shkaqet e sakta të vdekjes. Familja ndodhej në rivierën italiane për pushime dhe kishte planifikuar kthimin në Austri ditën e diel, më 19 korrik.