Një ngjarje tragjike është regjistruar mbrëmjen e së premtes në aksin rrugor Prrenjas–Librazhd, në fshatin Hotolisht. Sipas informacioneve paraprake të Policisë, rreth orës 22:30, një gur është shkëputur nga shpati i malit dhe ka rënë mbi automjetin tip Benz që po lëvizte në atë drejtim.
Si pasojë e goditjes së fortë, drejtuesi i mjetit, shtetasi Arjan Hoxha, 42 vjeç, ka humbur jetën në vendngjarje. Viktima ishte banues në fshatin Gjergjan të Elbasanit.
Shërbimet e Policisë dhe grupi hetimor kanë mbërritur menjëherë në vendin e incidentit. Autoritetet po vijojnë punën për dokumentimin e plotë ligjor të rrethanave në të cilat ndodhi shkëputja e masivit shkëmbor, ndërsa shkaqet e sakta mbeten ende nën hetim.