Një ngjarje e rëndë ka ndodhur në fshatin Domen të Postribës, ku një banesë e vjetër dhe e pabanueshme është përfshirë nga flakët. Si pasojë e zjarrit, është konfirmuar vdekja e një fëmije, trupi i të cilit është gjetur nga forcat zjarrfikëse gjatë operacionit të kërkim-shpëtimit.
Sipas informacioneve paraprake, nëna dhe dy fëmijët e saj kishin shkuar në këtë banesë kur zjarri ka shpërthyer. Autoritetet raportojnë se kërkimet janë duke vijuar për gjetjen e nënës dhe fëmijës tjetër, për të cilët dyshohet se kanë humbur jetën në këtë ngjarje tragjike.
Ndërhyrja e forcave të shpëtimit ka qenë e kufizuar për shkak të terrenit të vështirë malor. Banesa ndodhet në një vend që kërkon rreth 30 minuta ecje në këmbë nga rruga e aksesueshme për automjetet. Zjarrfikësit kanë mbërritur në vendngjarje, por për shkak të pozicionit gjeografik dhe njoftimit të vonuar, banesa ishte djegur plotësisht para se të ndërhyhej. Aktualisht, autoritetet po punojnë për zbardhjen e plotë të rrethanave dhe shkaqeve të këtij zjarri.
Përditësime
Autoritetet kanë konfirmuar identitetin e viktimave të zjarrit në Domen të Postribës: B.Ç., 24 vjeçe, dhe dy fëmijët e saj të mitur, 3 vjeç dhe 1.5 vjeç. Trupat e pajetë u gjetën nga ekipet e kërkim-shpëtimit në orën 13:10. Hetimet për zbardhjen e shkaqeve të rënies së zjarrit vijojnë.