Një ngjarje e rëndë ka ndodhur mesditën e kësaj të mërkure në fshatin Domen të njësisë administrative Postribë, në Bashkinë Shkodër, ku një banesë e vjetër dhe e pabanueshme është shkrumbuar plotësisht nga flakët.
Sipas informacioneve paraprake, në momentin e rënies së zjarrit, brenda objektit dyshohet se ndodheshin një grua dhe dy fëmijët e saj. Ndërhyrja e forcave zjarrfikëse është vështirësuar ndjeshëm nga terreni i thyer malor, pasi banesa ndodhet rreth 30 minuta në këmbë larg rrugës automobilistike. Kur ekipet e shpëtimit kanë mbërritur në vendngjarje, shtëpia ishte pothuajse e djegur tërësisht.
Sipas të dhënave më të fundit, forcat e emergjencës kanë gjetur një trup të pajetë në vendin e ngjarjes, i cili dyshohet se i përket njërit prej fëmijëve. Autoritetet policore dhe grupi hetimor ndodhen në terren për të kryer veprimet procedurale, për të zbardhur rrethanat e plota të kësaj tragjedie, si dhe për të konfirmuar fatin e personave të tjerë që dyshohet se ndodheshin brenda banesës.
Përditësime
Hetimet zbuluan se familja ishte zhvendosur me vetëdije në banesën e pabanueshme në fshatin Domen. Sipas grupit hetimor, njoftimi për zjarrin u bë me vonesë, duke penguar ndërhyrjen në kohë. Pas gjetjes së trupit të parë, ekipet e policisë dhe zjarrfikësit po vijojnë kërkimet në rrënoja për nënën dhe fëmijën tjetër.