Forcat speciale RENEA kanë rrethuar zonën ku dyshohet se fshihet 35-vjeçari Refit Buzi, i cili është shpallur në kërkim për vrasjen e Kosta Plaka dhe plagosjen e Belere Plaka. Ngjarja e rëndë ka ndodhur në fshatin Vidhisht të Roskovecit, si pasojë e konflikteve të mëparshme mes autorit dhe familjes së ish-partneres së tij.
Pas kryerjes së krimit me armë gjahu, 35-vjeçari mori me forcë ish-partneren Rozalinda Plaka, duke u larguar nga vendngjarja. Pas disa orësh negociatash intensive me efektivët e policisë, Buzi ka pranuar të lirojë gruan. Ajo ndodhet në gjendje të mirë shëndetësore, ndërsa forcat e rendit vijojnë operacionin për lokalizimin dhe arrestimin e autorit.
Policia e Shtetit konfirmon se ndaj Refit Buzi kishte pasur më herët denoncime për kërcënime ndaj familjes së viktimave. Për shkak se 35-vjeçari dyshohet se është i armatosur, masat e sigurisë në zonë janë shtuar maksimalisht gjatë aksionit të kërkimit.