Një ngjarje e rëndë është regjistruar mëngjesin e kësaj të premteje, rreth orës 06:00, në fshatin Vidhisht të Roskovecit. Sipas njoftimit zyrtar të Policisë së Shtetit, shtetasi Refit Buzi, 35 vjeç, dyshohet se ka qëlluar me armë gjahu ndaj ish-familjarëve të tij.
Si pasojë e të shtënave, ka ndërruar jetë 58-vjeçari Kosta Plaku, ndërsa ish-vjehrra e autorit, shtetasja Bejlere Plaku, 55 vjeçe, ka mbetur e plagosur. Ajo ndodhet në spital, nën kujdesin e mjekëve. Pas krimit, autori dyshohet se ka marrë peng ish-bashkëshorten e tij, Rozalina Plaku, 24 vjeçe, dhe është larguar nga vendngjarja me automjet, duke mbajtur me vete armën e përdorur.
Shërbimet e Policisë kanë ngritur pika kontrolli në akset kryesore për lokalizimin dhe arrestimin e autorit. Grupi hetimor, nën drejtimin e Prokurorisë, po punon për zbardhjen e rrethanave të ngjarjes. Familjarët e viktimës kanë deklaruar se autori ka qenë person me sjellje problematike dhe ishte denoncuar më parë në polici për kërcënimet ndaj tyre.
Përditësime
Policia ka gjetur 24-vjeçaren e rrëmbyer, e cila po merret në pyetje në ambientet e uniformave blu. Ndërkohë, nëna e saj ndodhet në gjendje kritike në repartin e Kujdesit Intensiv, pas një ndërhyrjeje kirurgjikale 5-orëshe. Në lidhje me ngjarjen, redaksia saktëson se autori është Nertil Buzi, duke korrigjuar raportimet e mëparshme mbi identitetin e tij.