Policia e Fierit ka arrestuar 52-vjeçarin Bledar Bakaj, pasi dyshohet se ka kryer veprat penale “Plagosja e rëndë me dashje” dhe “Veprime në kundërshtim me vendimin e Gjykatës”. Ngjarja është shënuar mbrëmjen e së dielës në fshatin Suk të Roskovecit, në banesën e 67-vjeçarit Enver Gremaj.
Sipas hetimeve paraprake, autori ka shkuar në banesën e familjes së ish-bashkëjetueses së tij, duke shkelur kështu urdhrin e mbrojtjes të caktuar nga gjykata. Gjatë një konflikti për motive të dobëta, 52-vjeçari e ka goditur Enver Gremaj me një mjet prerës, konkretisht me drapër, duke i shkaktuar plagë në këmbë. Pas incidentit, autori u largua, por u vu në pranga nga forcat e policisë rreth 30 minuta më vonë, pranë banesës së tij në fshatin Mbërsh.
I plagosuri është dërguar në spital për të marrë ndihmën e nevojshme mjekësore dhe raportohet se ndodhet jashtë rrezikut për jetën. Materialet procedurale i janë kaluar Prokurorisë për ndjekje të mëtejshme penale.
Përditësime
Hetimet e mëtejshme mbi ngjarjen në Roskovec zbuluan se autori i arrestuar, Bledar Bakaj, është daja i deputetes së Partisë Socialiste, Zegjine Çaushi. Autoritetet konfirmuan lidhjen familjare në kuadër të verifikimeve mbi profilin e 52-vjeçarit pas ngjarjes së rëndë në fshatin Suk.
Hetimet zbuluan një plan të mirëorganizuar të 52-vjeçarit Bledar Bakaj për të joshur ish-bashkëjetuesen e tij 34-vjeçare nën pretekstin e sigurimit të një vendi pune. Viktima rrëfeu për mediat se autori e kishte shantazhuar dhe dhunuar sistematikisht para ngjarjes së fundit. Sipas dëshmisë, Bakaj kishte kërcënuar gjithashtu babanë e saj, Enver Gremaj, me një sëpatë përpara se ta plagoste atë me drapër.