Trajneri i Trabzonsporit, Fatih Teke, ka folur pas humbjes me rezultat 4 me 1 ndaj Galatasarayit në Superkupën e Turqisë. Tekniku turk u pyet për planet e klubit në merkato dimërore dhe tregoi të qenët i revoltuar sa u përket kërkesave të klubeve për lojtarët që dëshiron të afrojë.
Muçi dhe kërkesa për 10 milionë euro
Në qendër të vëmendjes gjendet lojtari shqiptar Ernest Muçi, mesfushori ofensiv dhe numri 10 i skuadrës. Trabzonspori dëshiron ta mbajë atë në skuadër, por në fund të këtij sezoni është i detyruar të paguajë 10 milionë euro te Beşiktaşi për kartonin e tij, shifër të cilën Teke e vlerëson si të lartë dhe të paarsyeshme për kufizimet ekonomike të klubit.
"Jemi në kontakt me klubet e lojtarëve që na pëlqejnë për sa i përket transferimeve, por çmimet nuk janë të arsyeshme. Na pëlqen lojtari, por kërkojnë 10 milionë euro dhe kjo nuk realizohet. Na mbeten lojtarë të përkohshëm dhe 3–5 muaj nuk mjaftojnë për t'i bërë ata të kompletuar," u shpreh Teke.
Nevojat urgjente të skuadrës
Përveç Muçit, trajneri turk zbuloi se prioriteti i tij për merkato është shumë më i gjerë. Teke tha se dëshira e tij është të ketë një zëvendësues për numrin 10 në skuadër, kjo duke qenë "mënyra e vetme" që ekipi të jetë i kompletuar edhe në rast dëmtimesh.
"Kemi nevojë për të paktën dy mbrojtës qendre. Nuk kemi alternativa për mbrojtësin e djathtë dhe të majtë. Kemi mungesë edhe në krahë. Këto na duhen urgjentisht. Po të kishim para, do të doja një mesfushor dhe një numër 10. Nëse ndodh diçka me lojtarët tanë, do të kemi mungesa të mëdha," tha Teke.
Situata e skuadrës dhe perspektivat
Trajneri theksoi se skuadra është e re dhe e sapo formuar, fakt që e rëndon më tej situatën në merkato. Teke zbuloi se aktualisht ka edhe lojtarë që dëshiron të largohen, ndërsa qëndrimi i tij për transferimet është "ta çojmë lojën tonë një hap më përpara".
"Duhet të marrim një lojtar të kompletuar, por kjo duket e vështirë. Nëse nuk arrijmë ta bëjmë këtë, do të hasim vështirësi në çdo ndeshje. Edhe me dëmtimin më të vogël… Tashmë kemi dëmtime dhe mangësi," përfundoi Teke.
Situata në Trabzonspor tregon vështirësitë ekonomike të shumë klubeve të Superligës turke, ku kërkesa për transferime të lojtarëve të cilësisë mbetet e lartë, ndërsa buxhetët e disponueshëm nuk janë të mjaftueshëm.