Ernest Muçi nuk luajti të shtunën në ndeshjen e Trabzonspor-it kundër Galatasaray-it, pasi trajneri Fatih Teke e la në tribunë.
Lojtari shqiptar kishte pësuar dëmtim me Kombëtaren dhe, ndonëse ishte kthyer në stërvitje me klubin, shfaqi probleme të tjera. Dy ditë para ndeshjes, Muçi vuajti një spazmë të rëndë në kurriz. "Nuk është në fushë sot dhe nuk është e qartë nëse do të mund të luajë javën tjetër", tha trajneri para duelit.
Trabzonspor-i fitoi me rezultat 2-1. Pas ndeshjes, Fatih Teke u ndal te situata e Muçit. "Kjo ndeshje në veçanti ishte me të vërtetë e vështirë. Batagov-i do të jetë e vështirë që të kthehet në javën e ardhshme, Muçi do të jetë shumë e vështirë, Oulai do të jetë e vështirë", deklaroi ai.
Këto mungesa duket se do të vazhdojnë në një moment kyç të sezonit, kur Trabzonspor-i e sheh veten si protagonist në luftën për titull.