Policia e Gjirokastrës, në koordinim me Prokurorinë e Gjirokastrës, finalizoi operacionin e koduar “Autenticiteti”, si rezultat i një hetimi proaktiv për falsifikim dokumentesh. Gjatë operacionit u arrestuan në flagrancë shtetasit Altin Goxho, 51 vjeç, banues në Gjirokastër, Viktor Vedra, 45 vjeç, banues në fshatin Nepravishtë, dhe Edison Piro, 38 vjeç, banues në Sarandë.
Sipas hetimeve, Altin Goxho, administrator i një subjekti për transport ndërkombëtar mallrash, kishte pajisur 16 kamionë me certifikata të dyshuara të falsifikuara, që autorizonin veprimtarinë tregtare. Gjatë kontrollit në subjekt u sekuestruan këto 16 dokumente.
Në banesat e Viktor Vedrës dhe Edison Pirot u gjetën dhe u sekuestruan nga një diplomë dhe një listë notash të dyshuara të falsifikuara në secilën, në total 4 dokumente shkollore.
Hetimi disamujor vijon për identifikimin dhe nxjerrjen përpara përgjegjësisë penale të shtetasve të tjerë të përfshirë. Materialet procedurale iu referuan Prokurorisë së Gjirokastrës për veprime të mëtejshme.