Policia e Tiranës, në bashkëpunim me Prokurorinë, ka finalizuar me sukses operacionin policor të koduar "Gjeneralitetet", duke goditur një rrjet të falsifikimit të dokumenteve. Në pranga kanë rënë shtetasit Hashim Markaj, 53 vjeç, dhe i biri, Sulejman Markaj, 24 vjeç, si dhe bashkëpunëtori i tyre, Elidon Vladi, 37 vjeç.
Hetimet kanë zbuluar se banesa e shtetasve Markaj në fshatin Rrushkull të Durrësit ishte përshtatur si laborator për falsifikimin e dokumenteve të ndryshme, si diploma, certifikata, vërtetime gjyqësore dhe dokumente për aplikime në institucione zyrtare. Grupi i dyshuar përfitonte shuma që varionin nga 3000 deri në 5000 euro për çdo dokument të falsifikuar.
Në cilësinë e provës materiale, shërbimet e policisë kanë sekuestruar:
• 46 dokumente të dyshuara si të falsifikuara;
• 2 vula të dyshuara false;
• 6 celularë;
• 3 kompjuterë.
Materialet procedurale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Tiranë për veprime të mëtejshme. Autoritetet vijojnë hetimet për të identifikuar persona të tjerë që mund të jenë përfshirë në këtë veprimtari kriminale.