Policia e Tiranës, përmes Seksionit të Hetimit të Krimeve Ekonomiko-Financiare dhe nën drejtimin e Prokurorisë, finalizoi operacionin policor të koduar „Laboratori”. Si rezultat, u arrestua shtetasi Abas Tafa, 51-vjeç, banues në Zall-Bastar.
Gjatë kontrollit në banesën e të arrestuarit, shërbimet policore zbuluan një ambient të fshehtë, të përshtatur si laborator për falsifikimin e diplomave të shkollave të mesme, universiteteve të ndryshme, programeve master dhe licencave profesionale. Në kuadër të këtij operacioni u sekuestruan qindra dokumente të dyshuara si të falsifikuara, si dhe sende dhe pajisje të tjera të kundërligjshme që shërbenin për ushtrimin e veprimtarisë kriminale.
Abas Tafa ka qenë më parë kandidat për deputet nën siglën e Koalicionit EuroAtlantik, të drejtuar nga Lulzim Basha. Policia po punon për identifikimin e personave të tjerë të përfshirë në këtë aktivitet.
Materialet procedurale iu referuan Prokurorisë së Tiranës për veprime të mëtejshme.
Përditësime
Abas Tafa, mësues i gjuhës-letërsisë prej vitesh, nuk dha deklarata para grupit hetimor pas arrestimit. Ai ishte kandidat për deputet në zgjedhjet e 11 majit 2025.