Tre persona kanë mbetur të lënduar pas një incidenti me thikë që ka ndodhur në Komoran të komunës së Drenasit. Rasti, i cili po trajtohet nga Policia e Kosovës si vrasje në tentativë, u regjistrua të hënën, më 6 korrik 2026, rreth orës 19:02.
Sipas raportit zyrtar, tri viktima, meshkuj kosovarë, kanë pësuar lëndime trupore pasi janë sulmuar me thikë nga dy persona të tjerë, po ashtu meshkuj kosovarë. Pas kryerjes së veprës, të dyshuarit janë larguar në drejtim të panjohur dhe ndodhen në arrati.
Viktimat janë dërguar për trajtim mjekësor në Qendrën Klinike Universitare të Kosovës (QKUK). Lidhur me këtë ngjarje është njoftuar prokurori, ndërsa autoritetet policore janë duke punuar për zbardhjen e rrethanave të rastit dhe identifikimin e personave të përfshirë.