Tregtarët e veturave në Prishtinë ankohen për hapësirën e kufizuar në tregun e ri në Bërnicë të Poshtme, ku, sipas tyre, vështirësohet ekspozimi i automjeteve dhe qasja e blerësve. Ata thonë se ngushtësia po ndikon edhe në shitje. Tregu u zhvendos nga Zona Industriale, në drejtim të Fushë Kosovës, në lokacionin e ri më 11 tetor 2026, sipas njoftimit të Komunës së Prishtinës.
Tregtari Mentor Raçi tha se hapësira është e vogël dhe se blerësit nuk kanë ku të ndalen për t’i parë automjetet. Ai vlerësoi se lokacioni i ri nuk i plotëson kushtet e nevojshme për funksionimin e tregut dhe tha se shitjet kanë rënë.
Hysni Robelli tha se ngushtësia e vështirëson lëvizjen dhe hapjen e dyerve të automjeteve. Sipas tij, kjo ka ndikuar ndjeshëm në shitje. Lam Kastrati tha se zhvendosja ka lehtësuar trafikun në lokacionin e mëparshëm, por kërkoi investime të mëtejshme dhe zgjerim të hapësirës në tregun e ri.
Përveç automjeteve, në këtë lokacion tregtarët shesin edhe pemë e perime, shpezë, veshmbathje, mallra ushqimore dhe mobilje. Sipas tregtarëve, hapësirat e kufizuara vështirësojnë edhe zhvillimin e këtyre veprimtarive.
Komuna e Prishtinës kishte njoftuar se tregu i veturave, i cili më parë funksiononte në Zonën Industriale në drejtim të Fushë Kosovës, do të zhvendosej në Bërnicë të Poshtme nga 11 tetori 2026. Në njoftim, komuna u bëri thirrje shitësve, blerësve dhe vizitorëve që nga ajo datë të drejtoheshin në lokacionin e ri.