Trim Tërnava është emëruar kryeshef ekzekutiv i Operatorit të Sistemit të Transmetimit dhe Tregut të energjisë elektrike (KOSTT Sh.A.). Vendimi është marrë njëzëri nga Bordi i Drejtorëve në mbledhjen e 19 janarit 2026, pas një procesi transparent dhe konkurrues, në përputhje me Ligjin për Ndërmarrjet Publike.
KOSTT ka njoftuar se Tërnava do ta nisë detyrën zyrtarisht më 16 shkurt 2026. Ai ka konfirmuar personalisht emërimin për media.
Tërnava ka përfunduar studimet master në Ekonomi të Energjisë në Rice University në Shtetet e Bashkuara të Amerikës, ndërsa studimet themelore në Inxhinieri Elektrike në Universitetin e Prishtinës. Ai posedon përgatitje të avancuar akademike dhe profesionale në sektorin e energjisë, me fokus në ekonominë e energjisë, zhvillimin e tregut të energjisë, tranzicionin energjetik dhe proceset e integrimit rajonal e evropian.
Sipas njoftimit të KOSTT-it, Tërnava ka një dekadë përvojë profesionale dhe udhëheqëse në sektorin e energjisë. Ai synon forcimin e rolit të KOSTT-it në arritjen e objektivave strategjike, duke theksuar operimin e sigurt, të qëndrueshëm dhe të besueshëm të Sistemit të Transmetimit dhe Tregut të energjisë elektrike.
Para emërimit, pozitën e ushtronte Shaban Neziri si ushtrues detyre që nga prilli i 2025-s, pas ndërprerjes së marrëdhënies së punës me kryeshefin e mëparshëm Evetar Zeqiri. Neziri kishte mbajtur më parë funksionin e zëvendëskryeshefit ekzekutiv.
Përditësime
Trim Tërnava konfirmoi emërimin e tij si kryeshef ekzekutiv i KOSTT-it, duke deklaruar: "Po jam emëruar".
Ai mban rolin i Drejtorit Ekzekutiv dhe Partner Menaxhues të Energy Service LLC.
Në këtë pozicion:
- Udhëheq projekte të mëdha energjie diellore dhe BESS;
- Mbështet klientët në aspektet teknike, financiare dhe lehtësuese;
- Ofron ekspertizë në energjinë e ripërtëritshme, zhvillim projektesh, studime fizibiliteti dhe këshillim rregullator.