Presidenti i Shteteve të Bashkuara, Donald Trump, u shfaq në një moment të pazakontë në Shtëpinë e Bardhë, ku priti gazetarët gjatë dorëzimit të një porosie ushqimi nga platforma DoorDash.
Korrierja Sharon Simmons, nga Arkansas dhe e veshur me bluzën “DoorDash Grandma”, mbërriti me dy çanta nga McDonald’s jashtë Zyrës Ovale. Trump e përshëndeti atë dhe komentoi me ironi: “Kjo nuk duket e inskenuar, apo jo?”, para se të zhvillonte një konferencë shtypi improvizuar që zgjati rreth 15 minuta.
Gjatë bashkëbisedimit, presidenti promovoi politikën e tij për heqjen e taksave mbi bakshishet, duke e cilësuar si përfitim për punonjësit e shërbimeve. Ai u tha Simmons se kjo politikë “i përket vërtet asaj” dhe përmendi se ajo kishte kursyer mbi 11 000 dollarë duke mos deklaruar bakshishet. Presidenti e pyeti nëse kishte votuar për të, ndërsa ajo u përgjigj se “ndoshta” e kishte bërë.
Në vijim të ndërveprimit, Trump i dha korrieres një bakshish në para, ku gazetarët vunë re të paktën një kartëmonedhë prej 100 dollarësh. Ngjarja u zhvillua në mënyrë spontane dhe u lidh me axhendën fiskale të presidentit, ndërsa afrohet periudha e deklarimeve tatimore në SHBA.
Më vonë, drejtori i komunikimit i Shtëpisë së Bardhë, Steven Cheung, publikoi një imazh nga porosia, duke treguar drekën e presidentit.