Donald Trump, presidenti i Shteteve të Bashkuara, kritikoi të enjten planin e Mbretërisë së Bashkuar për t'ia transferuar sovranitetin e Ishujve Chagos Mauritiusit, duke mbajtur me qira bazën ushtarake të Diego Garcia për 99 vjet.
Në një postim në platformën Truth Social, Trump shkroi se ky territor "nuk duhet t'i merret Mbretërisë së Bashkuar" dhe se dhënia e tij do të ishte "një plagë për aleatin tonë të madh". Ai theksoi se marrëveshjet me qira "nuk janë të përshtatshme për shtetet" dhe paralajmëroi kryeministrin britanik Keir Starmer se po bënte një gabim të madh. Trump vuri në dukje rëndësinë strategjike të Diego Garcia, ishullit më të madh të arkipelagut në Oqeanin Indian, të përdorur si bazë e përbashkët ushtarake nga forcat britanike dhe amerikane. Ai përmendi nevojën e mundshme për bazën në rast konflikti me Iranin.
Këto deklarata vijnë pavarësisht mbështetjes së mëparshme nga Departamenti i Shtetit Amerikan, i cili miratoi marrëveshjen e Britanisë. Marrëveshja, e shpallur në maj të vitit të kaluar, parashikon që Britania ta marrë me qira bazën për 99 vjet, me një kosto prej 35 miliardë paundësh (rreth 47,3 miliardë dollarë) gjatë shekullit të ardhshëm.
Ministria e Jashtme britanike reagoi duke thënë se marrëveshja është "thelbësore për sigurinë e Mbretërisë së Bashkuar dhe aleatëve të saj", si dhe "e vetmja mënyrë për të garantuar të ardhmen afatgjatë të kësaj baze jetike". Deklaratat e Trump bëhen përpara bisedimeve të planifikuara javën e ardhshme mes Shteteve të Bashkuara dhe Mauritiusit.
Ishujt Chagos, nën kontroll britanik që nga viti 1814, kanë qenë subjekt mosmarrëveshjeje për dekada. Mauriciusi pretendon se i është mohuar sovraniteti gjatë pavarësisë së tij në vitin 1965, ndërsa popullsia ishullore u dëbua për të lejuar ndërtimin e bazës.