Donald Trump, president i SHBA, deklaroi se pezullimi përkohshëm i disa sanksioneve ndaj naftës ruse lidhet me nevojën për të siguruar furnizim të mjaftueshëm me energji në tregjet globale, në kushtet kur çmimet e naftës janë rritur ndjeshëm.
Në një intervistë për NBC News, Trump theksoi se qëllimi kryesor është stabilizimi i tregut energjetik. “Dua që të ketë naftë për botën. Dua që të ketë naftë”, u shpreh ai.
Sanksionet ndaj Rusisë u vendosën në vitin 2022, pas pushtimit të Ukrainës nga Moska. Presidenti amerikan premtoi se këto masa do të rivendosen sapo të përfundojë kriza aktuale.
I pyetur për kritikat e disa udhëheqësve të huaj ndaj këtij vendimi, Trump nuk iu përgjigj drejtpërdrejt, por kritikoi presidentin ukrainas Volodymyr Zelensky. “Jam i surprizuar që Zelensky nuk dëshiron të arrijë një marrëveshje. Thuajini Zelenskyt të gjejë një marrëveshje, sepse Vladimir Putin është i gatshëm ta bëjë një të tillë”, deklaroi ai.
Sipas disa burimeve, Trump komentoi edhe raportimet se Rusia mund të ketë ndarë informacione të inteligjencës me Iranin lidhur me vendndodhjen e forcave ushtarake amerikane. “Ndoshta Rusia po ofron informacion, ndoshta jo”, tha ai. Ai shtoi se SHBA po ndajnë informacione me Ukrainën dhe po përpiqen të rivendosin paqen mes dy vendeve.