Presidenti i Shteteve të Bashkuara, Donald Trump, deklaroi se forcat amerikane kanë shkatërruar 42 anije të marinës iraniane brenda tre ditësh. Deklarata u bë gjatë një samiti në Florida më 7 mars 2026.
Trump u shpreh se operacionet po zhvillohen me sukses. “Po ecim shumë mirë në Iran. Ka qenë e jashtëzakonshme”, tha ai. Sipas tij, përveç anijeve detare, SHBA ka goditur forcën ajrore dhe sistemet e komunikimit të Iranit. “Ky ishte fundi i marinës, ne shkatërruam forcën e tyre ajrore, ne shkatërruam komunikimet e tyre”, shtoi presidenti.
Më herët këtë javë, Sekretari amerikan i Mbrojtjes, Pete Hegseth, njoftoi se një anije luftarake iraniane u fundos. Trump bëri të ditur se pas fjalimit do të takohet me familjet e ushtarëve amerikanë që kanë humbur jetën në luftë. Ai i cilësoi ata “heronj të mëdhenj të vendit”, duke thënë se po kthehen në atdhe “në një mënyrë ndryshe nga ajo që mendonin”.
Administrata amerikane synon të mbajë në minimum humbjet e ushtarëve. “Ne do të bëjmë gjithçka për t’i mbajtur në minimum humbjet e ushtarëve tanë”, përfundoi Trump.
Ndërkohë, Britania e Madhe po rrit gatishmërinë e anijes luftarake HMS Prince of Wales. Marina Mbretërore e ka vendosur atë në gatishmëri për dislokim brenda pesë ditësh, nga 10 ditë më parë, për vendosje të mundshme në Lindjen e Mesme.