Donald Trump, presidenti i Shteteve të Bashkuara, deklaroi më 14 janar 2026 se vrasjet në Iran janë ndalur dhe nuk ka plane për ekzekutime të protestuesve. Ai e bëri këtë deklaratë nga Zyra Ovale gjatë një ceremonie nënshkrimi në Shtëpinë e Bardhë.
Trump tha se i është thënë nga burime të sigurta se "vrasjet në Iran po ndalen, janë ndalur dhe nuk ka asnjë plan për ekzekutime". Ai përmendi se shumë njerëz kishin folur gjatë dy ditëve të fundit se dita e sotme do të ishte dita e ekzekutimeve, duke iu referuar rastit të Erfan Soltani, protestues 26-vjeçar, i cili pritej të ekzekutohej të mërkurën, por kjo nuk ndodhi.
"Jemi njoftuar mjaft qartë se vrasjet në Iran po ndalojnë", shtoi Trump, duke paralajmëruar se do të ishte shumë i zhgënjyer nëse ky informacion nuk rezultonte i vërtetë. Ai premtoi se do ta përcjellë situatën dhe theksoi se ndërhyrja ushtarake amerikane tani duket e shtyrë, por nëse ndodh ndonjë ekzekutim, "të gjithë do të mërzitemi shumë".
Sipas korrespondentit amerikan James Matthews, komentet e Trump-it janë domethënëse, pasi ndalimi i vrasjeve mund të ketë qenë faktor vendimtar për të shmangur veprimin ushtarak kundër Iranit. Trump kishte paralajmëruar më herët se do të ndërmarrë masa të forta nëse regjimi në Teheran vazhdon me ekzekutimet.