Donald Trump, Presidenti i Shteteve të Bashkuara, bëri të ditur se ka zhvilluar një bisedë telefonike me Mark Rutte-n, Sekretarin e Përgjithshëm të NATO-s, në lidhje me çështjen e Groenlandës.
Gjatë kësaj bisede u ra dakord për një takim shumëpalësh në Davos të Zvicrës, ku mbahet Forumi Ekonomik Botëror. Trump pritet të marrë pjesë bashkë me udhëheqës të tjerë këtë javë.
Në një postim në rrjetin social Truth Social, Trump theksoi: "Pata një telefonatë të rëndësishme me Mark Rutte-n, Sekretarin e Përgjithshëm të NATO-s, lidhur me Groenlandën. Kam rënë dakord për një takim shumëpalësh në Davos të Zvicrës". Ai shtoi: "Groenlanda është e domosdoshme për sigurinë kombëtare dhe globale. Nuk ka kthim prapa. Të gjithë janë dakord për këtë!".
Trump përsëriti se Shtetet e Bashkuara janë "vendi më i fuqishëm në botë", duke e atribuar këtë forcë rindërtimit të ushtrisë gjatë mandatit të tij të parë. "Shtylla kryesore e kësaj fuqie është rindërtimi i Ushtrisë sonë gjatë Mandatit tim të Parë, një proces që po vazhdon me ritëm edhe më të shpejtë", deklaroi ai.
Çështja e Groenlandës mbetet qendrore, me Trump që nuk tërhiqet nga qëndrimi për ta bërë atë pjesë të territorit amerikan.
Përditësime
Donald Trump deklaroi para gazetarëve në Florida se Danimarka nuk mund ta mbrojë Groenlandën pasi danezët "as nuk shkojnë atje".
Trump tha se Evropa nuk mund të rezistojë kundër synimit të tij për Groenlandën.
Ai konfirmoi udhëtim në Davos nesër me një delegacion të madh amerikan për diskutime me udhëheqës evropianë.
Citate të reja:
- Anija daneze e 500 viteve më parë nuk jep pronësi mbi Groenlandën.
- SHBA-ja është e vetmja fuqi për paqe përmes forcës.
Donald Trump mbajti një fjalim dy-orësh në Shtëpinë e Bardhë për arritjet e tij dhe Groenlandën. Ai premtoi një zgjidhje për Groenlandën që kënaq të gjitha palët, përfshirë NATO-në, dhe refuzoi të jepte detaje për veprime ushtarake: "Do ta shihni". Trump propozoi zëvendësimin e OKB-së me "Bordin e Paqes", të themeluar prej tij, dhe kritikoi OKB-në. Ai komentoi Emmanuel Macron-in dhe Keir Starmer-in: i trajtojnë mirë kur është pranë, por duhet t'i rregullojnë vendet e tyre.
Air Force One u kthye në aeroport për probleme teknike, duke vonuar udhëtimin drejt Davos-it me 2,5 orë.
Zhvillime të tjera:
- Trump kërcënoi tarifa ndëshkuese ndaj Gjermanisë dhe vendeve evropiane të NATO-s duke filluar nga 1 shkurti, nëse nuk tërhiqen nga Groenlanda.
- Kryeministri i Groenlandës, Jens-Frederik Nielsen, e quajti të pamundur përdorimin e forcës ushtarake nga SHBA, por konfirmoi përgatitje për skenarë të mundshëm.
- Delegacioni amerikan në Davos është më i madhi ndonjëherë, duke përfshirë Jamieson Greer (Përfaqësues për Tregtinë) dhe Scott Bessent (Sekretar i Thesarit).
Donald Trump deklaroi në Davos nisjen e negociatave të menjëhershme për blerjen e Groenlandës. Ai tha se SHBA e dëshiron ishullin prej dy shekujsh dhe përmendi ngjarjet në Venezuelë si provë të fuqisë amerikane. Citate të reja:
- "Po kërkojmë vetëm një copë akulli";
- "Nuk duhet t’ia kishim kthyer Danimarkës Groenlandën në 1945".
Trump e quajti Danimarkën mosmirënjohëse, theksoi rritjen e buxhetit NATO nga 2% në 5% në mandatin e dytë dhe lidhjet familjare me Evropën (prindërit nga Gjermania dhe Skocia).