Kryeministri në detyrë i Kosovës, Albin Kurti, bëri të ditur se Fondi i Kursimeve Pensionale i Kosovës (Trusti) ka regjistruar rezultatin më të lartë investues për një periudhë gjashtëmujore që nga themelimi i tij. Sipas të dhënave zyrtare, kthimi bruto nga investimet për periudhën 1 janar – 30 qershor 2026 arriti vlerën prej 312 milionë eurosh.
Trendi i kthimit bruto nga investimet për vitet e fundit paraqitet si më poshtë:
• 2023: 88 milionë euro
• 2024: 247 milionë euro
• 2025: 309 milionë euro
• 2026 (gjashtëmujori i parë): 312 milionë euro
Në total, nga fillimi i vitit 2023 deri në fund të qershorit 2026, Trusti ka akumuluar rreth 956 milionë euro kthim bruto. Me këtë performancë, vlera e gjithëmbarshme e fondit ka arritur në 4 miliardë e 245 milionë euro.
Kryeministri Kurti vlerësoi se ky sukses dëshmon rëndësinë e profesionalizmit, integritetit dhe përgjegjësisë institucionale. Ai përgëzoi Bordin, menaxhmentin dhe punonjësit e institucionit për punën e bërë. Gjithashtu, kreu i qeverisë shtoi se ekzekutivi do të vazhdojë të kontribuojë në përmirësimin e kuadrit ligjor, duke respektuar pavarësinë institucionale të Trustit, me qëllim garantimin e sigurisë financiare për kontribuuesit pas pensionimit.