Gjatë dhjetë viteve të fundit, Fondi i Kursimeve Pensionale të Kosovës (Trusti) ka shënuar një fluks të lartë tërheqjesh të mjeteve financiare nga qytetarët. Sipas të dhënave zyrtare, shuma totale e tërhequr ka arritur në 744 milionë euro, shifër e cila rrjedh nga dalja në pension dhe masa e rimëkëmbjes ekonomike pas pandemisë.
Nga viti 2015 deri në vitin 2025, janë regjistruar 72.745 përfitues që kanë tërhequr mjetet e tyre për shkak të pensionimit, me një vlerë totale prej 546 milionë eurosh. Numri i përfituesve të pensionit ka shënuar rritje të vazhdueshme, duke arritur kulmin në vitin 2025 me 8.633 persona.
Një kontribut të ndjeshëm në totalin e tërheqjeve ka dhënë edhe skema e veçantë e miratuar gjatë pandemisë COVID-19, e cila lejoi qytetarët të tërheqin 10 përqind të kursimeve të tyre. Nga data 11 dhjetor 2020 deri më 6 prill 2021, përmes kësaj mase u tërhoqën 198.1 milionë euro, nga të cilat përfituan 427.363 qytetarë.
Trendi i tërheqjeve vjetore për pensionim ka mbetur i lartë edhe në periudhën pas pandemisë:
- Në vitin 2023 janë tërhequr 71.6 milionë euro.
- Në vitin 2024 janë tërhequr 69.7 milionë euro.
- Në vitin 2025 janë tërhequr 82.9 milionë euro.