Studentët italianë që ndjekin studimet e Mjekësisë në Tiranë, në kuadër të programit të përbashkët me Universitetin Tor Vergata të Romës dhe Universitetin Zoja e Këshillit të Mirë, nuk do të paguajnë më tarifa më të larta se bashkëmoshatarët e tyre në Itali.
Tarifat u ulën nga 9 650 euro në një vlerë që varion nga 0 deri në 3 100 euro, sipas të ardhurave familjare. Ky vendim erdhi pas rishikimit të marrëveshjes mes universiteteve, me synim garantimin e barazisë dhe aksesit të drejtë në arsim për rreth 220 studentë.
Ndërhyrja e ministres italiane të Universitetit dhe të Meritorimeve, Anna Maria Bernini, ishte kyçe. Ajo e cilësoi si të papranueshme pabarazinë financiare mes studentëve të të njëjtit program dhe u tregua e prerë me drejtuesit e Universitetit Tor Vergata. Ministrja kërkoi rishikimin e menjëhershëm të kontratës me palën shqiptare, nën kërcënimin e heqjes së akreditimit për këtë degë nëse tarifat nuk unifikoheshin.
Rektori i Universitetit Tor Vergata konfirmoi se, pas bisedimeve me palën shqiptare, u arrit bashkëpunimi i nevojshëm për të siguruar të drejtën e studimit pa barriera ekonomike. Ky reagim i shpejtë u konsiderua i domosdoshëm për të lejuar vazhdojmjen e shkollimit të studentëve pa penalizime nga vendndodhja gjeografike.
Ministrja Bernini theksoi se qëllimi i bashkëpunimit është zgjerimi i mundësive arsimore dhe jo krijimi i pabarazive të reja, duke bërë Mjekësinë të aksesueshme për të gjithë. Vendimi u zyrtarizua pas një debati të gjatë në mediat italiane.