Ish-ushtari i UÇK-së dhe investitori shqiptaro-amerikan, Uk Lushi, ka shprehur kritika të ashpra lidhur me zhvillimet dhe vendimet e fundit të Dhomave të Specializuara në Hagë ndaj ish-krerëve të UÇK-së. Në një deklarim të bërë gjatë emisionit "Edicioni Special" në Klan Kosova, Lushi theksoi se themelimi i këtij mekanizmi nga Kosova ishte pranuar me mirëbesimin se procedurat do të zhvilloheshin sipas standardeve të gjykatave në demokracitë perëndimore.
Sipas Lushit, procesi gjyqësor është i ndikuar politikisht dhe ka dëmtuar rëndë besimin e qytetarëve ndaj institucioneve të drejtësisë. Ai deklaroi: "Perëndimorët na tradhtuan, shkurt shqip na tradhtuan, për arsye se ju interesoi një verdikt politik dhe me këtë unë mendoj që në fakt ata kanë humbur më shumë".
Lushi argumentoi se pasojat e këtij gjykimi kalojnë përtej individëve të përfshirë në proces, duke paralajmëruar se ndikimi i tyre mund të jetë i konsiderueshëm për historinë e vendit. Ai pohoi se përpjekja në fjalë ka si synim "heqjen e UÇK-së nga historia", duke theksuar se çështja nuk duhet të kufizohet vetëm te krerët e akuzuar, por prek edhe dokumentimin e periudhës së luftës së Kosovës.