UNICEF bën të ditur se në dy javë të luftës në Liban kanë humbur jetën 111 fëmijë dhe mbi 330 të tjerë janë plagosur nga sulmet ajrore. Këto shifra u konfirmuan pas vizitës së Ted Chaiban, zv. drejtorit ekzekutiv të organizatës, në zonat e prekura.
Ted Chaiban deklaroi se mbi 1 milion njerëz janë zhvendosur në Liban, përfshirë 350 mijë fëmijë, që përbëjnë rreth 20% të popullsisë. Fëmijët janë pa shtëpi dhe pa shkollë, ndërsa klasat janë kthyer në streha për të zhvendosurit.
Një nënë e zhvendosur nga jugu i Libanit, Fatima Basharush, tregoi se fëmijët e saj nuk po ndjekin programin e rregullt mësimor. "Një fëmijë në klasën e pestë po mëson materialin e klasës së parë. Arsimi po regrecohet në vend që të avancojë."
UNICEF bën thirrje që palët në konflikt të mos godasin infrastrukturën civile. Sulmet ndaj spitaleve dhe punonjësve shëndetësorë kanë lënë dhjetëra të vdekur. Ted Chaiban nënvizoi se spitale, rrjeti i ujit dhe shkolla duhet të mbeten të mbrojtura.
Organizata po ofron kujdes shëndetësor, mbështetje psikosociale, ujë të pijshëm dhe ndihma emergjente në terren. Në platformën X, UNICEF në Liban apeloi për veprim të menjëhershëm për të ulur tensionet dhe mbrojtur fëmijët.
Për fëmijët e Libanit kjo nuk është kriza e parë. Në vitin 2019, kolapsi financiar, shpërthimi në portin e Bejrutit dhe pandemia kanë ndikuar thellë në jetën e tyre.