Në kuadër të 60-vjetorit të themelimit të tij, Universiteti i Arteve në Tiranë ndau certifikata mirënjohjeje për mbi 30 personalitete që kanë kontribuar në zhvillimin e institucionit dhe formimin e artistëve të rinj. Ngjarja u zhvillua më 13 maj.
Mes personaliteteve të nderuara ishte skulptori Kristaq Rama (1932-1998), i cili u vlerësua për "kontributin themeltar në krijimin e Fakultetit të Arteve të Bukura dhe rolin vendimtar në zhvillimin e arsimit të lartë në fushën e arteve, duke lënë gjurmë të qëndrueshme në formimin e brezave dhe në identitetin akademik të institucionit".
Në ceremoninë e zhvilluar në universitet morën pjesë studentë, ish-studentë, pedagogë dhe personalitete të artit e kulturës. Certifikatën me emrin e Kristaq Ramës e pranoi nipi i tij, Zaho Rama, djali i kryeministrit Edi Rama dhe bashkëshortes së tij, Linda Rama. Ky moment u duartrokit nga të pranishmit.