Uran Ismaili, deputet i Partisë Demokratike të Kosovës (PDK), ka reaguar për ekspozitën e fundit në Prishtinë, e cila ka tërhequr vëmendje për gabimet në përshkrimin e ngjarjeve dhe masakrave të luftës në Kosovë.
Sipas tij, ndërsa Ferdonije Qerkezei jeton çdo ditë me dhimbjen e luftës, në Hagë dhe Prishtinë akterë të ndryshëm po përpiqen ta shtrembërojnë historinë. Kjo, sipas Ismailit, synon harrimin e viktimave dhe dënimin e çlirimtarëve.
Në postimin e tij, Ismaili shkruan: «Kush e kupton më mirë se Nana Ferdonije dhembjen e kësaj lufte? Ajo jeton çdo ditë me të. Ndërkohë, si në Hagë, ashtu edhe në Prishtinë, akterë të ndryshëm po përpiqen të shtrembërojnë historinë tonë, që viktimat të harrohen, e çlirimtarët të dënohen. Pa të vërtetë, nuk ka drejtësi. Pa drejtësi, nuk ka as krenari për Kosovën. E pa këto të dyja, nuk mund të ketë një të ardhme të mirë».
Reagimi i tij vjen në kontekstin e ekspozitës së diskutueshme në Prishtinë, e cila ka shkaktuar debate për saktësinë historike.