Ish-administratori i Aeroportit Ndërkombëtar të Vlorës, Valon Lluka, ka reaguar lidhur me konfliktin publik për shitblerjen e aksioneve të këtij projekti. Nëpërmjet një letre të hapur, ai ka kundërshtuar akuzat e biznesmenit Behgjet Pacolli, i cili më herët kishte pretenduar për falsifikim të dokumentacionit.
Sipas Llukës, procesi i transferimit të 47% të aksioneve nga Mabco Constructions te kompania 2A Group, e përfaqësuar nga Valon Ademi, është zhvilluar në përputhje të plotë me vendimet zyrtare të aksionarëve. Lluka ka bërë të ditura dy momente kyçe të autorizimit:
• Në maj të vitit 2022, Mabco Construction SA miratoi shitjen e aksioneve dhe autorizoi Llukën për realizimin e procesit, me dokumente të noterizuara dhe apostiluara në Zvicër.
• Në korrik të vitit 2023, u lëshua një vendim dhe prokurë e posaçme që autorizonte sërish Llukën për nënshkrimin e dokumenteve dhe kryerjen e regjistrimeve ligjore.
Ish-administratori nënvizon se këto vendime mbajnë firmat e Behgjet Pacollit dhe Emin Pacollit. Përveç dokumenteve zyrtare, Lluka ka publikuar komunikime elektronike dhe biseda në aplikacionin WhatsApp me biznesmenin Pacolli, të cilat, sipas tij, dëshmojnë se drejtuesit e kompanisë kanë qenë të mirëinformuar për çdo hap të procesit.
Valon Lluka, i cili për rreth dy dekada ka qenë bashkëpunëtor i Pacollit, ka deklaruar se publikimi i këtyre provave synon transparencën, duke besuar se çështja duhet të trajtohet në rrugë institucionale dhe ligjore, pas akuzave të drejtpërdrejta të bëra ndaj tij gjatë muajve të fundit.
Përditësime
Ish-kryetari i Bordit të Banka Ekonomike, Valon Lluka, ka sqaruar pozicionin e tij lidhur me aksionet e Aeroportit të Vlorës. Lluka deklaroi se autorizimet e tij ishin të kufizuara në mandatet e dhëna nga Behgjet Pacolli, duke shtuar se nënshkrimi i kontratës kërkonte vendim formal nga aksionarët. Si dëshmi për të mbështetur pretendimet e tij, Lluka publikoi një komunikim në WhatsApp me Pacollin.