Një vatër e re zjarri është raportuar mëngjesin e sotëm, më 4 gusht 2026, në zonën e Rribanit në Mallakastër, ku flakët kanë përfshirë një sipërfaqe pyjore. Shërbimet zjarrfikëse ndodhen në terren për të neutralizuar flakët, megjithatë operacioni po kryhet me vështirësi. Shkak për këtë situatë është terreni i thyer dhe mungesa e rrugëve hyrëse që pengojnë aksesin e mjeteve të specializuara në zonën e prekur.
Kjo ngjarje pason një tjetër incident të ndodhur në Mallakastër ditën e djeshme, kur rreth 10 hektarë me ullishte dhe shkurre u dogjën pranë fshatit Hekal, në afërsi të Qafës së Vidhit. Në atë rast, flakët patën rrezikuar edhe banesat dhe puset e naftës përreth, por ndërhyrja në kohë mundësoi vënien e tyre nën kontroll.
Ndërkohë, një tjetër vatër zjarri u regjistrua mesditën e djeshme, më 3 gusht, pranë fshatit Vanaj në njësinë administrative Libofshë. Flakët përfshinë një sipërfaqe me shkurre dhe pemë. Forcat zjarrfikëse kanë punuar intensivisht për izolimin e zonës dhe aktualisht situata raportohet nën kontroll, pa rrezik për banorët apo infrastrukturën banesore. Autoritetet vijojnë të monitorojnë situatën për të shmangur riaktivizimin e flakëve.
Përditësime
Situata në Rriban të Mallakastrës është rënduar si pasojë e erërave të forta dhe terrenit të vështirë që kanë nxjerrë flakët jashtë kontrollit. Autoritetet kanë nisur ndërhyrjen nga ajri për izolimin e vatrës që rrezikon fondin pyjor, ndërsa forcat zjarrfikëse po vijojnë operacionet tokësore në zonat me akses të kufizuar.
Në zonën e Rribanit, flakët kanë përfshirë kurorat e pishave, duke vështirësuar ndërhyrjen e forcave zjarrfikëse dhe mjeteve ajrore. Era e fortë po favorizon përhapjen e shpejtë të vatrës në terrenin pyjor, duke e bërë operacionin më kompleks se gjatë orëve të para të mëngjesit.
Situata në Rriban është përkeqësuar sot, rreth orës 17:20, pasi flakët janë afruar zonave të banuara. Për të shmangur rrezikun ndaj banesave, Policia e Shtetit ka angazhuar Forcat e Ndërhyrjes së Shpejtë (FNSH) për sigurimin e perimetrit. Ndërsa vijojnë përpjekjet për shuarjen e vatrave në terrenin e vështirë të Mallakastrës, prioriteti mbetet ndërhyrja nga ajri për të frenuar përhapjen e mëtejshme të zjarrit.