Një zjarr i përmasave të konsiderueshme ka rënë pasditen e sotme në afërsi të fshatit Cfir në bashkinë e Mallakastrës. Flakët janë përhapur me shpejtësi, duke djegur një sipërfaqe të konsiderueshme të mbjellë me ullishte dhe pemëtari.
Sipas informacioneve nga terreni, reparti i zjarrfikësve të Mallakastrës ka mbërritur në vendngjarje dhe po punon për vënien nën kontroll të situatës. Operacioni për neutralizimin e flakëve po përballet me sfida serioze. Përveç erës së fortë, e cila ka favorizuar përhapjen e shpejtë të vatrës, terreni i thepisur kodrinor ka kufizuar ndjeshëm mundësinë e afrimit të mjeteve të rënda zjarrfikëse. Për këtë arsye, pjesëtarët e shërbimit zjarrfikës po detyrohen të ndërhyjnë edhe me mjete rrethanore për të frenuar përhapjen e zjarrit në zona të tjera.
Deri në këto momente, autoritetet bëjnë me dije se nuk ka raportime për dëme në njerëz. Ndërkaq, shkaqet e rënies së zjarrit mbeten ende të paqarta dhe pritet që hetimet përkatëse të përcaktojnë rrethanat në të cilat ndodhi kjo ngjarje.