Pas disa orësh punë intensive, reparti i shërbimit zjarrfikës i Bashkisë Mallakastër ka arritur të vërë nën kontroll zjarrin që shpërtheu në afërsi të fshatit Cfir. Operacioni për shuarjen e flakëve zgjati më shumë se 4 orë, duke kërkuar angazhimin e 9 efektivëve dhe 2 automjeteve zjarrfikëse të bashkisë.
Sipas të dhënave, zjarri preku një sipërfaqe prej rreth 2 hektarësh, duke shkatërruar pyje dhe shkurre, si dhe rreth 50 rrënjë ullinj. Ndërhyrja u vështirësua nga terreni i thyer i zonës dhe erërat e forta që favorizuan përhapjen e flakëve, duke detyruar forcat e shpëtimit që të përdornin edhe mjete rrethanore për izolimin e vatrës së zjarrit.
Aktualisht, situata është plotësisht nën kontroll dhe nuk raportohen më vatra aktive. Ekipet zjarrfikëse mbeten në terren për të monitoruar zonën dhe për të parandaluar çdo mundësi të riaktivizimit të flakëve. Shkaqet e rënies së zjarrit mbeten ende të paqarta.