Gjatë pasdites së 31 korrikut, një vatër zjarri është regjistruar në fshatin Greshicë të bashkisë Mallakastër. Flakët, të favorizuara nga era e fortë dhe temperaturat e larta, janë përhapur me shpejtësi drejt zonave ku ndodheshin banesa, duke krijuar rrezik për dëme materiale. Ndërhyrja e shpejtë e shërbimit zjarrfikës të Mallakastrës ka bërë të mundur vënien nën kontroll të situatës brenda rreth 1 ore, duke shmangur përhapjen e mëtejshme dhe duke siguruar banesat e zonës.
Si pasojë e zjarrit, është raportuar dëmtimi i rreth 30 rrënjëve ullinj, sipërfaqeve të mbjella me vreshta, si dhe sasisë së bazës ushqimore të destinuar për bagëtinë. Autoritetet lokale janë duke kryer verifikimet përkatëse për të përcaktuar dëmet e plota.
Në lidhje me shkaqet e rënies së zjarrit, të dhënat paraprake sugjerojnë se një banor i zonës po digjte mbetje bimore në oborrin e banesës, gjë që dyshohet se ka nxjerrë flakët jashtë kontrollit. Nga ana tjetër, autoritetet zyrtare vijojnë hetimet për të zbardhur me saktësi rrethanat e ngjarjes. Ky rast shënon zjarrin e tretë të regjistruar në territorin e Mallakastrës brenda 24 orëve të fundit.