Kryeprokurori i Prokurorisë Speciale, Blerim Isufaj, ka qëndruar sot për një vizitë në fshatin Kalludër të Zubin Potokut, ku po vijojnë gërmimet në një varr masiv. Në këtë lokacion janë zbuluar mbetje mortore dhe veshmbathje, të cilat dyshohet se u përkasin 23 intelektualëve të zhdukur nga Mitrovica gjatë luftës.
Duke folur për ecurinë e procesit, Isufaj sqaroi se gërmimet janë në fazën preliminare dhe nuk mund të caktohet një afat kohor për përfundimin e tyre. Sipas tij, identifikimi kërkon kohë dhe standarde të rrepta, duke përfshirë konstruktimin e trupave dhe analizat e ADN-së.
"Këto mbetje nuk mund të tërhiqen lehtë, pasi duhet paraprakisht të konstruktuohet trupi i njeriut, të dërgohen në Mjekësinë Ligjore dhe pastaj të vazhdohet me procedurat e tjera", deklaroi Isufaj. Ai u zotua se institucioni që ai drejton do të ndjekë procedura profesionale, të paanshme dhe të pavarura, në respekt të viktimave dhe familjarëve të tyre.
Isufaj gjithashtu kërkoi përmbajtje nga deklaratat publike rreth këtij rasti. Ai theksoi se deklarimet e parakohshme mund të dëmtojnë procesin hetimor dhe të ndikojnë në devijimin e rezultatit final të çështjes.
Në lidhje me këtë zbulim, autoritetet kanë arrestuar dy persona të nacionalitetit serb. Gjykata kompetente tashmë ka caktuar ndaj tyre masën e sigurisë së paraburgimit prej një muaji.
Përditësime
Kryeprokurori i Prokurorisë Speciale, Blerim Isufaj, ka konfirmuar se mbetjet mortore të gjetura në lokacionin Kalludër e Vogël janë me origjinë njerëzore. Ministrja e Drejtësisë, Albulena Haxhiu, ka vizituar vendin e ngjarjes për të monitoruar procesin e zhvarrimit. Gërmimet në këtë varr masiv, të cilat nisën të martën, kanë hyrë në ditën e katërt dhe po zhvillohen nga ekipet mjeko-ligjore.