Një grua raportohet e zhdukur në komunën e Deçanit, pas denoncimit të familjarëve ditën e djeshme. Operacioni i kërkimit vazhdon me pjesëmarrjen e policisë dhe ekipeve të kërkim-shpëtimit.
Fadil Gashi, zëdhënës i Policisë për rajonin e Pejës, deklaroi se "operacioni i kërkimit po vazhdon. Në terren kanë dalë policia dhe ekipet e kërkim-shpëtimit. Ende nuk kemi ndonjë gjurmë të saj".
Fidan Abazi nga Kërkim-Shpëtimi Malor i Kosovës foli në edicionin special të Klan Kosova mbrëmë. Ai njoftoi se gjatë kërkimeve është gjetur një pjesë veshjeje në afërsi të Manastirit të Deçanit, e cila dyshohet se i përket gruas së zhdukur. "Ne jemi duke i zhvilluar aktivitetet tona të kërkimit dhe krejt çka mundemi me thanë deri më tani në këtë drejtim", tha ai.
Sipas informacioneve, gruaja vuante nga depresioni. Kërkimet vazhdojnë pa gjurmë të reja.