Auron Tare ka publikuar një rrëfim historik për vdekjen e princit italian Giorgio di Borbone-Parma në Tepelenë. Ngjarja ndodhi më 19 mars 1941, në malin Trebeshinës, gjatë Betejës së Kuotës 731.
Princi, oficer i ushtrisë mbretërore italiane dhe anëtar i aristokracisë, kishte marrë pjesë në fushata ushtarake në Etiopi dhe Libi. Me gradën kapiten, ai komandonte një kompani të njësive speciale Arditi të Divizionit 51-të të Këmbësorisë “Siena”. Njësia e tij kishte bazën në kampin e Tepelenës, ku sot ndodhet stadiumi i qytetit. Princi kishte zbarkuar në Durrës.
Gjatë dimrit 1940-1941, forcat italiane kishin ngecur në vijën e frontit përgjatë lumit Vjosa. Vizita e Benito Mussolini në front nuk arriti të motivonte trupat për të shtyrë grekët mbrapsht. Më 9 mars 1941, italianët nisën një ofensivë të gjerë për të marrë lartësitë strategjike në zonën e Trebeshinës, të mbajtura nga ushtria greke.
Kuota 731 u bombardua për ditë të tëra. Njësitë speciale këmishëzinj dhe Arditët ndërmorën sulme të përsëritura kundër grekëve. Princi Giorgio di Borbone-Parma u vra nga një plumb në kokë gjatë luftimeve trup më trup pranë llogoreve greke. Zona u mbush me trupa italianë të vrarë.
Me hyrjen e trupave gjermane në Greqi në prill 1941, grekët u tërhoqën duke braktisur pozicionet. Maja e Trebeshinës, e njohur si Kuota 731, u shpall zonë e shenjtë.